Жаштардын жүрөгүндөгү маданий мурас: "Манас ааламы, Чыңгыз Айтматов дүйнөсү"

Жаштардын жүрөгүндөгү маданий мурас: "Манас ааламы, Чыңгыз Айтматов дүйнөсү"
Жаштардын жүрөгүндөгү маданий мурас: "Манас ааламы, Чыңгыз Айтматов дүйнөсү"
Жаштардын жүрөгүндөгү маданий мурас: "Манас ааламы, Чыңгыз Айтматов дүйнөсү"
Жаштардын жүрөгүндөгү маданий мурас: "Манас ааламы, Чыңгыз Айтматов дүйнөсү"
Жаштардын жүрөгүндөгү маданий мурас: "Манас ааламы, Чыңгыз Айтматов дүйнөсү"

Бүгүн Евразия эл аралык университети Эл аралык медициналык университет жана Медициналык-фармацевтикалык колледж менен биргеликте «Манас ааламы, Чыңгыз Айтматов дүйнөсү» аттуу маданий-чыгармачылык иш-чара өткөрдү. Студенттерди жана конокторду бириктирген бул майрам эки маанилүү датага арналды: 4-декабрь — кыргыз элинин баатырдыгынын жана биримдигинин символу болгон «Манас» эпосунун күнү жана 12-декабрь — улуу жазуучу Чыңгыз Айтматовдун туулган күнү.

Иш-чаранын урматтуу коноктору — «Манас» улуттук театрынын, Чыңгыз Айтматов фондунун өкүлдөрү, И.Арабаев атындагы Кыргыз мамлекеттик университетинин окутуучулары жана студенттери, ошондой эле «Билим Бишкек Кейжи» мектебинин мугалимдери жана окуучулары болушту.

Салтанат «Билим Бишкек Кейжи» мектебинин жаш манасчыларынын чыгармасы менен ачылды. Алар улуу Манас тууралуу жан дили менен айтып беришип, улуттук ырларды ырдап, бийлерди аткарышты. Айрыкча манасчы Анжеликанын «Манас» эпосунан үзүндү окуп, байыркы замандын руху жана күчү менен залды толтурганы көрүүчүлөргө өзгөчө таасир калтырды.

Студенттердин Чыңгыз Айтматовдун чыгармаларынан театрлаштырылган оюн-зооктору каармандардын жашоосун, жаратылышын жана ички дүйнөсүн чагылдырган терең образдарды ачып, көрүүчүлөргө чыгарманын көркөм дүйнөсүн сезүүгө шарт түздү.

Кыргыздын улуттук «Кара жорго» бийин индиялык студенттердин аткаруусу маданияттын улуттар аралык достукту чыңдоого өбөлгө түзөрүн айкын көрсөттү.

Иш-чара муундар менен маданий доорлордун ортосундагы символикалык көпүрө болуп калды. Окуу жайлардын жетекчилери мындай иш-чаралардын маанилүүлүгүнө токтолуп, жаштарды улуттук салт, маданият жана тарыхты урматтоого үндөөдө алар эбегейсиз роль ойной турганын баса белгилешти.

Майрамдын жыйынтыгында «Манас» эпосу жана Чыңгыз Айтматовдун чыгармачылык мурасы ар бир жарандын жана кесипкөй адамдын жүрөгүндө жашап, өзүнүн тамырларын жана маданий мурасын урматтоого дем бере турган руханий кенч экендиги баса белгиленди.