Евразиялык эл аралык университет Түштүк Казакстандын мектептери үчүн онлайн-конференция өткөрдү

19-Февраль 2025-жылы Евразиялык эл аралык университет Казакстандын Жамбыл облусунун Шу райондук билим берүү бөлүмүнүн өкүлдөрүнүн, орто мектептердин, гимназиялардын директорлорунун, педагогдорунун жана окуучуларынын катышуусунда эл аралык онлайн-конференция өткөрдү. Иш-чара "М.Макатаев атындагы таяныч орто мектеби" коммуналдык мамлекеттик мекемесинин колдоосу менен уюштурулду.

Конференцияга Шунун райондук билим берүү бөлүмүнүн өкүлдөрү, ошондой эле аймактын алдыңкы билим берүү мекемелеринин жамааттары жана окуучулары кошулду:

* М. Макатаев атындагы таяныч орто мектеби (14 мугалим жана 110 окуучу);

* Э. Бекмаханов атындагы гимназия (6 мугалим жана 68 окуучу);

* "Домалак эне" орто мектеби (4 мугалим жана 20 окуучу);

* М. Ауезов атындагы орто мектеп (6 мугалим жана 30 окуучу).

Иш-чаранын алкагында Евразиялык эл аралык университеттин өкүлдөрү окуу жай, анын билим берүү программалары жана чет элдик студенттер үчүн мүмкүнчүлүктөрү тууралуу айтып беришти. Катышуучуларга университеттин ишмердүүлүгүнүн негизги аспектилерин чагылдырган видеоролик көрсөтүлдү.

Конференциянын маанилүү окуясы болуп ЕЭУ жана " М.Макатаев атындагы таяныч орто мектеби” КММнин ортосунда кызматташуу жөнүндө меморандумга кол коюу болду. Бул кадам кызматташтыкты бекемдейт жана билим берүү тармагында биргелешкен долбоорлор үчүн жаңы мүмкүнчүлүктөрдү ачат.

Иш-чаранын соңунда спикерлер катышуучулардын университетке кабыл алуунун тартиби, окутуунун формасы жана наркы, жатакана менен камсыз кылуу жана башка актуалдуу темаларга байланыштуу суроолоруна жооп беришти.

Онлайн-конференция ЕЭУ менен Шу районунун мектептеринин ортосундагы кызматташтыкты чыңдоо үчүн маанилүү аянтча болуп калды, ошондой эле сапаттуу жогорку билим алууга кызыккан окуучулар үчүн жаңы мүмкүнчүлүктөрдү ачты.

Евразиялык эл аралык университет иш-чаранын бардык катышуучуларына жана уюштуруучуларына ыраазычылык билдирет жана мындан ары жемиштүү кызматташууга дилгирлигин билдирет.